عمران ہاشمی کی فلم”ایک تھی ڈائن“کے گانے”کالی کالی آنکھیں“کی ویڈیو جاری

ممبئی…این جی ٹی…بالی ووڈ کے رومانٹک ہیرو عمران ہاشمی جادوگر بن گئے، تھرل، ہارر اور رومانس پر مبنی نئی فلم ”ایک تھی ڈائن“ کے نئے رومانٹک گانے ”کالی کالی آنکھیں“ کی ویڈیو جاری کردی گئی۔ معروف نغمہ نگار گلزار کے تحریر کردہ ”کالی کالی آنکھوں کا، کالاکالا جادو ہے“ کے بولوں پر مبنی اس گانے کو گلوکار کلنٹن کریجو کی آواز میں ریکارڈ کیا گیا ہے جس میں عمران کو ہما قریشی کے ساتھ رومانس کرتے دکھایا گیاہے۔ ہدایت کار کنان آئیر کی اس فلم میں عمران کے ساتھ کونکنا سین شرما بحیثیت ہیروئن جبکہ کالکی کوچلن اور ہما قریشی اہم کرداروں میں جلوہ گر ہوئی ہیں۔ بالاجی موشن پکچرز کے بینر تلے اس فلم کو ایکتا کپور، شوبھا کپور اور وشال بھردواج نے پروڈیوس کیا ہے جبکہ وشال نے فلم کی کہانی تحریر کرنے کے ساتھ ساتھ اس کا میوزک بھی ترتیب دیا ہے۔ ہارر اور تھرل سے بھرپور یہ فلم رواں سال 18اپریل کو سینما گھروں کی زینت بنائی جارہی ہے جس کی تشہیری مہم ابھی سے شروع کردی گئی ہے۔