Visiting The Graves Of Martyrs...قبورِ شہداء کی زیارت

ہجرت کا تیسرا سال

قبورِ شہداء کی زیارت

قبورِ شهداء

حضور صلی ﷲ تعالیٰ علیہ وسلم شہداء اُحد کی قبروں کی زیارت کے لئے تشریف لے جاتے تھے اور آپ کے بعد حضرت ابوبکر صدیق و حضرت عمر فاروق رضی ﷲ تعالیٰ عنہما کا بھی یہی عمل رہا۔ ایک مرتبہ حضور صلی ﷲ تعالیٰ علیہ وسلم شہداء احد کی قبروں پر تشریف لے گئے تو ارشاد فرمایا کہ یا ﷲ! تیرا رسول گواہ ہے کہ اس جماعت نے تیری رضا کی طلب میں جان دی ہے، پھر یہ بھی ارشاد فرمایا کہ قیامت تک جو مسلمان بھی ان شہیدوں کی قبروں پر زیارت کے لئے آئے گا اور ان کو سلام کرے گا تو یہ شہداء کرام رضی اللہ تعالیٰ عنہم اس کے سلام کا جواب دیں گے۔

چنانچہ حضرت فاطمہ خزاعیہ رضی ﷲ تعالیٰ عنہا کا بیان ہے کہ میں ایک دن اُحد کے میدان سے گزر رہی تھی حضرت حمزہ رضی ﷲ تعالیٰ عنہ کی قبر کے پاس پہنچ کر میں نے عرض کیا کہ

اَلسَّلاَمُ عَلَيْکَ يَا عَمَّ رَسُوْلِ اللّٰه

(اے رسول ﷲ عزوجل و صلی ﷲ تعالیٰ علیہ وسلم کے چچا ! آپ پر سلام ہو)

تو میرے کان میں یہ آواز آئی کہ

وَعَلَيْکِ السَّلَامُ وَرَحْمَةُ اللهِ وَبَرَکَاتُهٗ

(مدارج النبوة ج۲ ص۱۳۵)