Rudad-e-Muhabbat Kya Kahiye Kuch Yaad Rahi Kuch Bhool Gaye

رُودادِ محبّت کیا کہئیے کُچھ یاد رہی کچھ بھول گئے
دو دِن کی مُسرّت کیا کہئیے کُچھ یاد رہی کُچھ بھول گئے

جب جام دیا تھا ساقی نے جب دور چلا تھا محفل میں
اِک ہوش کی ساعت کیا کہئیے کُچھ یاد رہی کُچھ بھول گیے

اب وقت کے نازک ہونٹوں پر مجروح ترنّم رقصاں ہے
بیدادِ مشیّت کیا کہئیے کُچھ یاد رہی کُچھ بُھول گئے

احساس کے میخانے میں کہاں اَب فکر و نظر کی قندیلیں
آلام کی شِدّت کیا کہئیے کُچھ یاد رہی کُچھ بھول گئے

کُچھ حال کے اندھے ساتھی تھے کُچھ ماضی کے عیّار سجن
احباب کی چاہت کیا کہئیے کُچھ یاد رہی کُچھ بھول گئے

کانٹوں سے بھرا ہے دامنِ دِل شبنم سے سُلگتی ہیں پلکیں
پُھولوں کی سخاوت کیا کہئیے کُچھ یاد رہی کُچھ بھول گئے

اب اپنی حقیقت بھی ساغر بے ربط کہانی لگتی ہے
دُنیا کی کی حقیقت کیا کہئیے کُچھ یاد رہی کُچھ بھول گئے

ساغر صدّیقی

Rudad-e-muhabbat kya kahiye kuch yaad rahi kuch bhool gaye
do din ke masarrat kya kahiye kuch yaad rahi kuch bhool gaye

jab jam diya tha saqi ne jab daur chala tha mahafil mein
wo hosh ke sa’at kya kahiye kuch yaad rahi kuch bhool gaye

ab waqt ke nazuk honton per majrooh tarranum raqsan hai

bedad e mshiyat kia kahiye kuch yad rahi kuch bhool gaye

ehasas ke maikhane mein kahan ab fikr-o-nazar ke qandilen
aalam ke shiddat kya kahiye kuch yaad rahi kuch bhool gaye

kuch haal k andhe sathi the kuch mazi ke ayyar sajan

ahbab ki chahat kia kahiye kuch yaad rahi kuch bhool gaye

Kanton se bhara hai daman e dil shabnam se sulagti hain palkein

phoolon ki sakhawat kia kahiye kuch yaad rahi kuch bhool gaye

ab apni haqiqat bhi “sagar” berabt kahani lagti hai
duniya ke haqiqat kya kahiye kuch yaad rahi kuch bhool gaye

Read More

Muhabbat Ke Mazaaron Tak Chalen Gy

محبت کے مزاروں تک چلیں گے
ذرا پی لیں! ستاروں تک چلیں گے

سنا ہے یہ بھی رسم عاشقی ہے
ہم اپنے غمگساروں تک چلیں گے

چلو تم بھی! سفر اچھا رہے گا
ذرا اجڑے دیاروں تک چلیں گے

جنوں کی وادیوں سے پھول چن لو
وفا کی یادگاروں تک چلیں گے

حسین زلفوں کے پرچم کھول دیجیے
مہکتے لالہ زاروں تک چلیں گے

چلو ساغر کے نغمے ساتھ لے کر
چھلکتی جوئے باراں تک چلیں گے

ساغر صدیقی

Read More

Kiya Tamasha Ho

وہ بلائیں تو کیا تماشا ہو
ہم نہ جائیں تو کیا تماشا ہو

یہ کناروں سے کھیلنے والے
ڈوب جائیں تو کیا تماشا ہو

بندہ پرور جو ہم پہ گزری ہے
ہم بتائیں تو کیا تماشا ہو

آج ہم بھی تری وفاؤں پر
مسکرائیں تو کیا تماشا ہو

تیری صورت جو اتفاق سے ہم
بھول جائیں تو کیا تماشا ہو

وقت کی چند ساعتیں ساغر
لوٹ آئیں تو کیا تماشا ہو

Read More

Hum Faqeeron Se Guftagu Ker Lo

آبِ انگور سے وضُو کر لو
دوستو! بیعت سبُو کر لو

گُر بتادیں گے بادشاہی کے
ہم فقیروں سے گفتگو کر لو

اُن سے ملنا کوئی محال نہیں
اُن سے مِلنے کی آرزُو کر لو

دو قدم رائیگاں ہوئے تو کیا
دو قدم اور جستجو کر لو

جشن زارِ حیات میں ساغر
چار دن تم بھی ہاؤ ہُو کر لو

Read More

Hai Dua Yaad Mager Harf e Dua Yad Nahi

ہے دعا یاد مگر حرفِ دعا یاد نہیں

میرے نغمات کو اندازِ دعا یاد نہیں

ہم نے جن کے لئیے راہوں میں بچھایا تھا لہو

ہم سے کہتے ہیں وہی، عہدِ وفا یاد نہیں

زندگی جبرِ مسلسل کی طرح کاٹی ہے

جانے کس جرم کی پائی ہے سزا، یاد نہیں

میں نے پلکوں سے درِ یار پہ دستک دی ہے

میں وہ سائل ہوں جسے کوئی صدا یاد نہیں

کیسے بھر آئیں سرِ شام کسی کی آنکھیں

کیسے تھرائی چراغوں کی ضیاء یاد نہیں

صرف دھندلاتے ستارے کی چمک دیکھی ہے

کب ہوا، کون ہوا، مجھ سے جدا، یاد نہیں

آؤ اک سجدہ کریں عالمِ مدہوشی میں

لوگ کہتے ہیں کہ ساغر کو خدا یاد نہیں

ساغر صدیقی

Read More

Aaj Roothy Hue Saajan Ko Bahut Yaad Kia...

آج روٹھے ہوئے ساجن کو بہت یاد کیا                      
اپنے اجڑے ہوئے گلشن کو بہت یاد کیا                     

جب کبھی تقدیر نے گھیرا ہے ہمیں                        
گیسوئے یار کی الجھن کو بہت یاد کیا                      

شمع کی جوت پہ جلتے ہوئے پروانوں نے                 
اک ترے شعلہ دامن کو بہت یاد کیا                       

جس کے ماتھے پہ نئی صبح کا جھومر ہو گا               
ہم نے اس وقت کی دلہن کو بہت یاد کیا                   

آج ٹوٹے ہوئے سپنوں کی بہت یاد آئی ہے                  
آج بیتے ہوئے ساون کو بہت یاد کیا                      

ہم سرِ طور بھی مایوس تجلی ہی رہے                     
اس درِ یار کی چلمن کو بہت یاد کیا                       

مطمئن ہو ہی گئے دام و قفس میں ساغر                     
ہم اسیروں نے نشیمن کو بہت یاد کیا                        

(ساغرصدیقی)                          

Read More