Tera Qurb Tha ke Faraq Tha...

تیرا قرب تھا کہ فراق تھا وہی تیری جلوہ گری رہی

کہ جو روشنی تیرے جسم کی تھی میرے بدن میں بھری رہی

تیرے شہر میں چلا تھا جب تو کوئی بھی ساتھ نہ تھا میرے

تو میں کس سے محوِ کلام تھا؟ تو یہ کس کی ہمسفری رہی؟

مجھے اپنے آپ پہ مان تھا کہ نہ جب تلک ترا دھیان تھا

تو مثال تھی میری آگہی تو کمال بے خبری رہی

میرے آشنا بھی عجیب تھے نہ رفیق تھے نہ رقیب تھے

مجھے جاں سے درد عزیز تھا انہیں فکرِ چارہ گری رہی

میں یہ جانتا تھا میرا ہنر ہے شکست و ریخت سے معتبر

جہاں لوگ سنگ بدست تھے وہیں میری شیشہ گری رہی

جہاں ناصحوں کا ہجوم تھا وہیں عاشقوں کی بھی دھوم تھی

جہاں بخیہ گر تھے گلی گلی وہیں رسمِ جامہ دری رہی

تیرے پاس آ کے بھی جانے کیوں میری تشنگی میں ہراس تھا

بہ مثالِ چشمِ غزال جو لبِ آبجو بھی ڈری رہی

جو ہوس فروش تھے شہر کے سبھی مال بیچ کے جا چکے

مگر ایک جنسِ وفا میری سرِ رَہ دھری کی دھری رہی

مرے ناقدوں نے فرازؔ جب میرا حرف حرف پرکھ لیا

تو کہا کہ عہدِ ریا میں بھی جو بات کھری تھی کھری رہی

(اے عشق جنوں پیشہ سے انتخاب)