جس نے مدینے جانڑاں
جس نے مدینے جانڑاں کر لو تیاریاں
بیڑا مدینے والا لیندا پیا تاریاں
حاجیاں نے اٹھ سویرے بہہ کے روزے دے نیڑے
رو رو کے سوہنے اگے عرضاں گذاریاں
حاجیاں نے چومی جالی جالی او کرماں والی
لکھ پہریداراں پانویں چھڑیاں نے ماریاں
اوتھے نے ٹھنڈیاں چھاواں دلکش مخمور ہواواں
کھلیاں بہشتاں دیاں جینویں سب باریاں
کعبے دے گرد گھمیئے روزے دی جالی چُمیئے
تک آیئے جنت دیاں نالے کیاریاں
شالا او دن وی آوے سوہڑاں سانوں کول بلاوے
رل مل کے دیکھن روضہ اے سیاں ساریاں
آب زم زم میں پیواں اوتھے میں مراں تے جیواں
صدقہ نواسیاں دا سن میریاں زاریاں
سوہنے نوں راضی کریئے رحمت تھیں جھولی بھریئے
پلکاں دے نال دئیے تھاں تھاں بہاریاں
رب دا حبیب اوتھے سب دا طبیب اوتھے
ہوندیاں مدینے جا کے دور بیماریاں
صدمے کیوں حجر دے سہیئے ایتھے اک پل نہ رہیئے
وسدے چلے جایئے مار اڈاریاں
صورت نورانی جس دی دنیا دیوانی جس دی
کیوں نہ میں جاواں حافظ اؔس توں بل ہاریاں
0 comments:
Post a Comment