Mager Ab Bhi Dil Ko jawaN Rakhen

نہ وہ سِن ھے فرصتِ عشق کا، نہ وہ دِن ھیں کشفِ جمال کے
مگر اب بھی دِل کو جواں رکھیں وھی شعبدے خدوخال کے

یہ جو گرد بادِ حیات ھے، کوئی اس کی زد سے بچا نہیں
مگر آج تک تِری یاد کو میں رکھوں سنبھال سنبھال کے

میں امین و قدر شناس تھا، مجھے سانس سانس کا پاس تھا
یہ جبیں پہ ھیں جو لکھے ھُوئے، یہ حساب ھیں مہ و سال کے

وہ کبھی شفق کا فسُوں کہیں، کبھی گُل کہیں کبھی خوُں کہیں
کہ ھیں میری صُبحِ عروج میں ابھی رنگ شامِ زوال کے

مِری حسرتوں کو ھرا رکھے، مِری کِشتِ جاں کو بھرا رکھے
یہ یقیں، کہ مجھ پہ کُھلیں گے دَر کِسی روز بادِ شمال کے

شبِ تار سے نہ ڈرا مجھے، اے خدا! جمال دکھا مجھے
کہ تِرے ثبوت ھیں بیشتر تِری شانِ جاہ و جلال کے

کوئی کوہکن ھو کہ قیس ھو، کوئی میر ھو کہ ندیم ھو
سبھی نام ایک ھی شخص کے، سبھی پُھول ایک ھی ڈال کے