سونم کپوراور تامل اسٹار دھنوش کی رانجھناکے ٹریلر نے دھوم مچادی

ممبئی …کولاویری دی جیسے سپرہٹ گانے سے دنیا بھر میں تہلکہ مچانے والے نیشنل ایوارڈ یافتہ تامل سپر اسٹار دھنوش بالی ووڈ فلم انڈسٹری میں اینٹری کے لیے تیار ہیں جن کی سونم کپور کیساتھ پہلی رومانٹک فلم"رانجھنا"کے ٹریلر نے آتے ہی دھوم مچادی ہے۔پانچ روز قبل منظر عام پر آنے والے ٹریلر میں موجود مستی اور ہلکے پھلکے رومانس نے لوگوں کو اپنا دیوانہ بنالیا ہے جسے اب تک 21سے زائد افراد آن لائن دیکھ کر پسندیدگی کی سند دے چکے ہیں۔ ہدایتکار آنند ایل رائی کی اس فلم میں دھنوش اور سونم کپور کیساتھ ابھے دیول،سوارا بھاسکر اور محمد ذیشان ایوب اہم کرداروں میں جلوہ گر ہورہے ہیں۔کرشیکالولا کی پروڈیوس کردہ اس فلم کی کہانی اسکول کے دو بچوں کی بچپن سے لڑکپن تک کے سفر اور پیار کے گردگھومتی ہے جسکی کہانی اوراسکرین پلے ہمانشو شرما نے تحریر کیا ہے۔35کروڑ کے بجٹ سے بننے والی اس رومانٹک فلم کا میوزک شہرہ آفاق موسیقار اے آر رحمان نے ترتیب دیا ہے جو21جون کو سینما گھروں کی زینت بنے گی۔