حال یہ ہے کہ خواہشِ پُرسشِ حال بھی نہیں

                                        حال یہ ہے کہ خواہشِ پُرسشِ حال بھی نہیں

حال یہ ہے کہ خواہشِ پُرسشِ حال بھی نہیں

اُس کو خیال بھی نہیں، اپنا خیال بھی نہیں

اے شجرِ حیاتِ شوق، ایسی خزاں رسیدگی؟

پوششِ برگ و گُل تو کیا، جسم پہ چھال بھی نہیں

مُجھ میں وہ شخص ہو چکا جس کا کوئی حساب تھا

سُود ہی کیا، زیاں ہے کیا، اس کا سوال بھی نہیں

مست ہیں اپنے حال میں دل زدگان و دلبراں

صُلح و سلام تو کُجا، بحث و جدال بھی نہیں

تُو میرا حوصلہ تو دیکھ، داد تو دے کہ اب مجھے

شوقِ کمال بھی نہیں، خوفِ زوال بھی نہیں

جون ایلیا