Introduction Of Jaun Elia.

جون ایلیا

علامہ جون ایلیا (14 دسمبر، 1937ء – 8 نومبر، 2002ء) برصغیر ‏میں نمایاں حیثیت رکھنے والے پاکستانی شاعر، فلسفی، سوانح نگار ‏اور عالم تھے۔

وہ اپنے انوکھے انداز تحریر کی وجہ سے سراہے جاتے ‏تھے۔ وہ معروف صحافی رئیس امروہوی اور فلسفی سید محمد تقی کے ‏بھائی، اور مشہور کالم نگار زاہدہ حنا کے سابق خاوند تھے۔ جون ایلیا کو ‏عربی، انگریزی، فارسی، سنسکرت اور عبرانی میں اعلی مہارت ‏حاصل تھی۔

Read More

Tum Mje Btao To

::: تم مجھے بتاؤ تو :::

تم نے مجھ کو لکھا ہے، میرے خط جلا دیجیئے
مجھ کو فکر رہتی ہے آپ انہیں گنوا دیجیئے
آپ کا کوئی ساتھی دیکھ لے تو کیا ہو گا
دیکھیے میں کہتی ہوں یہ بہت بُرا ہو گا

میں بھی کچھ کہوں تم سے اے مری فروزینہ
زشکِ سروِ سیمینا
اے بہ نازُکی مینا
اے بہ جلوہ آئینہ
میں تمہارے ہر خط کو لوحِ دل سمجھتا ہوں
لوحِ دل جلا دوں کیا
سطر سطر ہے ان کی، کہکشاں خیالوں کی
کہکشاں لُٹا دوں کیا
جو بھی حرف ہے ان کا ، نقشِ جانِ شیریں ہے
نقشِ جاں مٹا دوں کیا
ان کا جو بھی نقطہ ہے، ہے سوادِ بینائی
میں انہیں گنوا دوں کیا
لوحِ دل جلا دوں کیا
کہکشاں لُٹا دوں کیا
نقشِ جاں مٹا دوں کیا

مجھ کو ایسے خط لکھ کر اپنی سوچ میں شاید
جرم کر گئی ہو تم
اور خیال آنے پر اس سے ڈر گئی ہو تم
جُرم کے تصور میں گر یہ خط لکھے تم نے
پھر تو میری رائے میں جُرم ہی کئے تم نے
اے مری فروزینہ!
دل کی جانِ زرّینا!
رنگ رنگ رنگینا!
بات جو ہے وہ کیا ہے
تم مجھے بتاؤ تو ۔۔۔۔۔
میں تمہیں نہیں سمجھا
تم سمجھ میں آؤ تو
جُرم کیوں کیے تم نے
خط ہی کیوں لکھے تم نے

جون ایلیا

Read More

Na Gila Rahy,Na Gumaa'n Rahy

نہ گلے رہے نہ گماں رہے، نہ گزارشیں رہیں نہ گفتگو            
وہ نشاطِ وعدہء وصل کیا _ ہمیں اعتبار بھی اب نہیں               

جون ایلیا

Read More

Abhi Ik Shor Sa Utha Hai Kahin...

ابھی اک شور سا اٹھا ہے کہیں                      
کوئی خاموش ہوگیا ہے کہیں                       

ہے کچھ ایسا کہ جیسے یہ سب کچھ                  
اس سے پہلے بھی ہوچکا ہے کہیں                   

تجھ کو کیا ہوگیا کہ چیزوں کو                      
کہیں رکھتا ہے ڈھونڈتا ہے کہیں                     

جو یہاں سے کہیں نہ جاتا تھا                       
وہ یہاں سے چلا گیا ہے کہیں                      

آج شمشان کی سی بو ہے یہاں                         
کیا کوئی جسم جل رہا ہے کہیں                      

ہم کسی کے نہیں جہاں کے سوا                      
ایسی وہ خاص بات کیا ہے کہیں                     

تو مجھے ڈھونڈ میں تجھے ڈھونڈوں                  
کوئی ہم میں سے رہ گیا ہے کہیں                    

کتنی وحشت ہے درمیانِ ہجوم                    
جس کو دیکھو گیا ہوا ہے کہیں                     

میں تو اب شہر میں کہیں بھی نہیں                 
کیا مرا نام بھی لکھا ہے کہیں                     

اسی کمرے سے کوئی ہوکے وداع                    
اسی کمرے میں چھپ گیا ہے کہیں                   

مل کے ہر شخص سے ہوا محسوس                  
مجھ سے یہ شخص مل چکا ہے کہیں                  

(جون ایلیا)                            

Read More

دل میں رہنے کی جگہ دو تو مزہ آجائے

                                                دل میں رہنے کی جگہ دو تو مزہ آجائے

دل میں رہنے کی جگہ دو تو مزہ آجائے

زلف زنجیر بنا دو تو مزہ آجائے

چشمِ حیراں کو تجلی کی ہے خواہش ہر پل

پھر سے اک طُور جلا دو تو مزہ آجائے

وصل کا خواب جو دیکھا تھا شبِ فرقت میں

اسکو تعبیر بنا دو تو مزہ آجائے

میرا ہمشکل ہے اک شخص سرِ آئینہ

تم اسے مجھ سے ملا دو تو مزہ آجائے

زندگی کی تو سبھی ہم کو دعا دیتے ہیں

تم ہمیں زہر پلا دو تو مزہ آجائے

میں تو صحرا ہوں محبت کا مرے خشک ہیں لب

تم مری پیاس بجھا دو تو مزہ آجائے

دل کا ویرانہ ہے تاریک بہت، لیکن تم

آکے اک شمع جلا دو تو مزہ آجائے

روز پیتا ہوں سَبُو سے تو اس شَب تم

اپنے ہونٹوں سے پلا دو تو مزہ آجائے

Read More

Neya Ik Rishta Paida Kiun Karen Hum...

                                        نیا اک رشتہ پیدا کیوں کریں ہم

نیا اک رشتہ پیدا کیوں کریں ہم

بچھڑنا ہے تو جھگڑا کیوں کریں ہم

خموشی سے ادا ہو رسمِ دوری

کوئی ہنگامہ برپا کیوں کریں ہم

یہ کافی ہے کہ ہم دشمن نہیں ہیں

وفاداری کا دعویٰ کیوں کریں ہم

وفا، اخلاص، قربانی،مرو ّت

اب ان لفظوں کا پیچھا کیوں کریں ہم

سنا دیں عصمتِ مریم کا قصّہ؟

پر اب اس باب کو وا کیوں کریں ہم

زلیخائے عزیزاں بات یہ ہے

بھلا گھاٹے کا سودا کیوں کری ہم

ہماری ہی تمنّا کیوں کرو تم

تمہاری ہی تمنا کیوں کریں ہم

کیا تھا عہد جب لحموں میں ہم نے

تو ساری عمر ایفا کیوں کریں ہم

اُٹھا کر کیوں نہ پھینکیں ساری چیزیں

فقط کمروں میں ٹہلا کیوں کریں ہم

جو اک نسل فرومایہ کو پہنچے

وہ سرمایہ اکٹھا کیوں کریں ہم

نہیں دُنیا کو جب پرواہ ہماری

تو پھر دُنیا کی پرواہ کیوں کریں ہم

برہنہ ہیں سرِبازار تو کیا

بھلا اندھوں سے پردا کیوں کریں ہم

ہیں باشندے اسی بستی کے ہم بھی

سو خود پر بھی بھروسہ کیوں کریں ہم

پڑی رہنے دو انسانوں کی لاشیں

زمیں کا بوجھ ہلکا کیوں کریں ہم

یہ بستی ہے مسلمانوں کی بستی

یہاں کارِ مسیحا کیوں کریں ہم

Read More

شوق کا رنگ بُجھ گیا یاد کے زخم بھر گئے

                                      شوق کا رنگ بُجھ گیا یاد کے زخم بھر گئے

شوق کا رنگ بُجھ گیا یاد کے زخم بھر گئے

کیا میری فصل ہو چُکی کیا میرے دن گُزر گئے

راہگُزر خیال میں دوش بدوش تھے جو لوگ

وقت کے گردباد میں جانے کہاں بکھر گئے

شام ہے کتنی بے تپاک شہر ہے کتنا سہم ناک

ہم نفسو کہاں ہو تم جانے یہ سب کدھرگئے

آج کی شام ہے عجیب کوئی نہیں میرے قریب

آج سب اپنے گھر رہے آج سب اپنے گھر گئے

رونقِ بزمِ زندگی طُرفہ ہیں تیرے لوگ بھی

اک تو کبھی نہ آئے تھے، گئے تو رُوٹھ کر گئے

خوش نفسانِ بےنوا، بے خبرانِ خوش ادا

تِیرہ نصیب تھے مگر شہر میں نام کر گئے

آپ بھی جون ایلیا سوچئے اب دھرا ہے کیا

آپ بھی اب سدھاریئے آپ کے چارہ گر گئے

Read More

چاہتا ھوں کہ بھول جاؤں تمہیں

                                                                   چاہتا ھوں کہ بھول جاؤں تمہیں

چاہتا ھوں کہ بھول جاؤں تمہیں

اور یہ سب دریچہ ھائے خیال

جو تمہاری ھی سمت کھلتے ھیں

بند کر دوں کہ کچھ اسطرح کہ یہاں

یاد کی اک کرن بھی آ نہ سکے

چاھتا ھوں کہ بھول جاؤں تمہیں

اور خود بھی نہ یاد آؤں تمہیں

جیسے تم صرف اک کہانی تھیں

جیسے میں صرف اک فسانہ تھا

Read More

سو وہ آنسو ھمارے آخری آنسو تھے

                                                      سو وہ آنسو ھمارے آخری آنسو تھے

سو وہ آنسو ھمارے آخری آنسو تھے

جو ھم نے گلے ملکر بہائے تھے

نہ جانے وقت ان آنکھوں سے پھر کس طور پیش آیا

مگر میری فریب وقت کی بہکی ھوئی آنکھوں نے

اس کے بعد بھی

آنسو بہائے ھیں

مرے دل نے بہت سے دکھ رچائے ھیں

مگر یوں ھے کہ ماہ و سال کی اس رائیگانی میں

مری آنکھیں

گلے ملتے ھوئے رشتوں کی فرقت کے وہ آنسو

پھر نہ رو پائیں

Read More

جانے کب سے

                                                                                              جانے کب سے

جانے کب سے

مجھے یاد بھی تو نہیں جانے کب سے

ھم اک ساتھ گھر سے نکلتے ھیں

اور شام کو

ایک ھی ساتھ گھر لوٹتے ھیں

مگر ھم نے اک دوسرے سے

کبھی حال پرسی نہیں کی

نہ اک دوسرے کو

کبھی نام لے کر مخاطب کیا

جانے ھم کون ھیں؟

Read More

عشق پیچاں کی صندل پر جانے کس دن بیل چڑھے

                         عشق پیچاں کی صندل پر جانے کس دن بیل چڑھے

عشق پیچاں کی صندل پر جانے کس دن بیل چڑھے

کیاری میں پانی ٹھہرا ھے دیواروں پر کائی ھے

حسن کے جانے کتنے چہرے حسن کے جانے کتنے نام

عشق کا پیشہ حسن پرستی عشق بڑا ھرجائی ھے

آج بہت دن بعد میں اپنے کمرے تک آ نکلا تھا

جوں ھی دروازہ کھولا ھے اس کی خوشبو آئی ھے

ایک تو اتنا حبس ھے پھر میں سانسیں روکے بیٹھا ھوں

ویرانی نے جھاڑو دے کے گھر میں دھول اڑائی ھے

Read More

کون سا قافلہ ھے یہ

                                                                 کون سا قافلہ ھے یہ

کون سا قافلہ ھے یہ ، جس کے جرس کا ھے یہ شور

میں تو نڈھال ھو گیا ، ھم تو نڈھال ھوگئے

خار بہ خار گل بہ گل فصل بہار آ گئی

فصل بہار آ گئی ، زخم بحال ھو گئے

شور اٹھا مگر تجھے لذت گوش تو ملی

خوں بہا مگر ترے ھاتھ تو لال ھو گئے

ھم نفسان وضع دار ، مستمعان بردبار

ھم تو تمہارے واسطے ایک وبال ھو گئے

جون کرو گے کب تلک اپنا مثالیہ تلاش

اب کئی ہجر ھو چکے اب کئی سال ھو گئے

Read More

ایک سایہ مرا مسیحا تھا

                                                                                  ایک سایہ مرا مسیحا تھا

ایک سایہ مرا مسیحا تھا

کون جانے، وہ کون تھا، کیا تھا

وہ فقط صحن تک ہی آتی تھی

میں بھی حُجرے سے کم نکلتا تھا

تجھ کو بھولا نہیں وہ شخص کے جو

تیری بانہوں میں بھی اکیلا تھا

جان لیوا تھیں خواہشیں ورنہ

وصل سے انتظار اچھا تھا

بات تو دل شکن ہے پر، یارو!

عقل سچی تھی، عشق جھوٹا تھا

اپنے معیار تک نہ پہنچا میں

مجھ کو خود پر بڑا بھروسہ تھا

جسم کی صاف گوئی کے با وصف

روح نے کتنا جھوٹ بولا تھا

Read More

ہم کو سودا تھا سر کے مان میں تھے

                                                     ہم کو سودا تھا سر کے مان میں تھے

ہم کو سودا تھا سر کے مان میں تھے

پاؤں پھسلا تو آسمان میں تھے

ہے ندامت لہو نہ رویا دل

زخم دل کے کسی چٹان میں تھے

میرے کتنے ہی نام اور ہمنام

میرے اور میرے درمیان میں تھے

میرا خود پر سے اِعتماد اُٹھا

کتنے وعدے مری اُٹھان میں تھے

تھے عجب دھیان کے در و دیوار

گرتے گرتے بھی اپنے دھیان میں تھے

واہ! اُن بستیوں کے سنّاٹے

سب قصیدے ہماری شان میں تھے

آسمانوں میں گر پڑے یعنی

ہم زمیں کی طرف اُڑان میں تھے

Read More

تمہارا ہجر منا لوں اگر اجازت ہو

                                                                  تمہارا ہجر منا لوں اگر اجازت ہو

تمہارا ہجر منا لوں اگر اجازت ہو

میں دل کسی سے لگا لوں اگر اجازت ہو

تمہارے بعد بھلا کیا ہیں وعدہ و پیماں

بس اپنا وقت گنوا لوں اگر اجازت ہو

تمہارے ہجر کی شب ہائے کار میں جاناں

کوئی چراغ جلا لوں اگر اجازت ہو

جنوں وہی ہے، وہی میں، مگر ہے شہر نیا

یہاں بھی شور مچا لوں اگر اجازت ہو

کسے ہے خواہشِ مرہم گری مگر پھر بھی

میں اپنے زخم دکھا لوں اگر اجازت ہو

تمہاری یاد میں جینے کی آرزو ہے ابھی

کچھ اپنا حال سنبھالوں اگر اجازت ہو

Read More

بے انتہائی شیوہ ہمارا سدا سے ہے

                                                      بے انتہائی شیوہ ہمارا سدا سے ہے

بے انتہائی شیوہ ہمارا سدا سے ہے

اک دم سے بھولنا اسے پھر ابتدا سے ہے

یہ شام جانے کتنے ہی رشتوں کی شام ہو

اک حزن دل میں نکہت موج صبا سے ہے

دستِ شجر کی تحفہ رسانی ہے تا بہ دل

اس دم ہے جو بھی دل میں مرے وہ ہوا سےہے

جیسے کوئی چلا بھی گیا ہو اور آئے بھی

احساس مجھ کو کچھ یہی ہوتا فضا سے ہے

دل کی سہولتیں ہیں عجب ، مشکلیں عجب

ناآشنائی سی عجب اک آشنا سے ہے

اس میں کوئی گلہ ہی روا ہے نہ گفتگو

جو بھی یہاں کسی کا سخن ہے وہ جا سے ہے

آئے وہ کِس ہنر سے لبوں پر کہ مجھ میں جون

اک خامشی ہے جو مرے شورِ نوا سے ہے

Read More

ہر بار میرے سامنے آتی رہی ہو تم

                                                             ہر بار میرے سامنے آتی رہی ہو تم

ہر بار میرے سامنے آتی رہی ہو تم

ہر بار تم سے مل کے بچھڑتا رہا ہوں میں

تم کون ہو یہ خود بھی نہیں جانتی ہو تم

میں کون ہوں یہ خود بھی نہیں جانتا ہوںمیں

تم مجھ کو جان کر ہی پڑی ہو عذاب میں

اور اسطرح خود اپنی سزا بن گیا ہوں میں

تم جس زمین پر ہو میں اُس کا خدا نہیں

پس سر بسر اذیت و آزار ہی رہو

بیزار ہو گئی ہو بہت زندگی سے تم

جب بس میں کچھ نہیں ہے تو بیزار ہی رہو

تم کو یہاں کے سایہ و پرتو سے کیا غرض

تم اپنے حق میں بیچ کی دیوار ہی رہو

میں ابتدائے عشق سے بے مہر ہی رہا

تم انتہائے عشق کا معیار ہی رہو

تم خون تھوکتی ہو یہ سُن کر خوشی ہوئی

اس رنگ اس ادا میں بھی پُر کار ہی رہو

میں نے یہ کب کہا تھا محبت میں ہے نجات

میں نے یہ کب کہا تھا وفادار ہی رہو

اپنی متاعِ ناز لُٹا کر مرے لیئے

بازارِ التفات میں نادار ہی رہو

جب میں تمہیں نشاطِ محبت نہ دے سکا

غم میں کبھی سکونِ رفاقت نہ دے سکا

جب میرے سب چراغِ تمنا ہوا کے ہیں

جب میرے سارے خواب کسی بے وفا کے ہیں

پھر مجھ کو چاہنے کا تمہیں کوئی حق نہیں

تنہا کراہنے کا تمہیں کوئی حق نہیں

Read More

زخمِ امید بھر گیا کب کا

                                                                                  زخمِ امید بھر گیا کب کا

زخمِ امید بھر گیا کب کا

قیس تو اپنے گھر گیا کب کا

آپ اک اور نیند لے لیجئے

قافلہ کُوچ کر گیا کب کا

دکھ کا لمحہ ازل ابد لمحہ

وقت کے پار اتر گیا کب کا

اپنا منہ اب تو مت دکھاؤ مجھے

ناصحو، میں سُدھر گیا کب کا

نشہ ہونے کا بےطرح تھا کبھی

پر وہ ظالم اتر گیا کب کا

آپ اب پوچھنے کو آئے ہیں؟

دل میری جاں، مر گیا کب کا

Read More

بے قراری سی بے قراری ہے

                                                                    بے قراری سی بے قراری ہے

بے قراری سی بے قراری ہے

وصل ہے اور فراق طاری ہے

جو گزاری نہ جا سکی ہم سے

ہم نے وہ زندگی گزاری ہے

بن تمہارے کبھی نہیں آئی

کیا مری نیند بھی تمھاری ہے

اس سے کہیو کہ دل کی گلیوں میں

رات دن تیری انتطاری ہے

ایک مہک سمت دل سے آئی تھی

میں یہ سمجھا تری سواری ہے

خوش رہے تو کہ زندگی اپنی

عمر بھر کی امید واری ہے

Read More

بزم سے جب نگار اٹھتا ہے

                                                                       بزم سے جب نگار اٹھتا ہے

بزم سے جب نگار اٹھتا ہے

میرے دل سے غبار اٹھتا ہے

میں جو بیٹھا ہوں تو وہ خوش قامت

دیکھ لو! بار بار اٹھتا ہے

تیری صورت کو دیکھ کر مری جاں

خود بخود دل میں پیار اٹھتا ہے

اس کی گُل گشت سے روش بہ روش

رنگ ہی رنگ یار اٹھتا ہے

تیرے جاتے ہی اس خرابے سے

شورِ گریہ ہزار اٹھتا ہے

کون ہے جس کو جاں عزیز نہیں؟

لے ترا جاں نثار اٹھتا ہے

صف بہ صف آ کھڑے ہوئے ہیں غزال

دشت سے خاکسار اٹھتا ہے

ہے یہ تیشہ کہ ایک شعلہ سا

بر سرِ کوہسار اٹھتا ہے

کربِ تنہائی ہے وہ شے کہ خدا

آدمی کو پکار اٹھتا ہے

تو نے پھر کَسبِ زَر کا ذکر کیا

کہیں ہم سے یہ بار اٹھتا ہے

لو وہ مجبورِ شہر صحرا سے

آج دیوانہ وار اٹھتا ہے

اپنے ہاں تو زمانے والوں کا

روز ہی اعتبار اٹھتا ہے

جون اٹھتا ہے، یوں کہو، یعنی

میر و غالب کا یار اٹھتا ہے --

جون ایلیا

Read More