ہالی وڈ کی فلموں میں استعمال کی گئیں مختلف اشیا کا نیلام

لاس اینجلس…ہالی وڈ کی فلموں میں استعمال کی گئی چیزیں بھی شائقین میں بہت مقبول ہوتی ہیں، فلم اسٹار ٹریک کی لیزر رائفل دو لاکھ اکتیس ہزار ڈالر میں نیلام ہوگئی۔لاس اینجلس میں فلمی اشیا کے نیلام گھر میں مختلف چیزیں فروخت کے لیے رکھی گئی تھیں۔ دو روزہ نیلامی میں فلمی مداحوں نے بڑھ چڑھ کر حصہ لیا۔ اسٹار ٹریک کے لیے خصوصی طور پر بنائی گئی لیزر رائفل منتظمین کی توقعات سے کئی گنا زیادہ قیمت پر فروخت ہوئی۔ سپر مین 4 کا کاسٹیوم پچیس ہزار ڈالر میں نیلام ہوا۔ فروخت کی گئی دیگر اشیا میں مارلن منرو کی تصویریں، ملبوسات اور دوسرے فن کاروں کے زیر استعمال رہنے والی چیزیں شامل تھیں۔