ایک تیر سے دو شکار،جرمن سائنسدانوں نے موٹر سائیکل ٹیکسی ایجاد کر لی

برلن…این جی ٹی… دنیا بھر میں ٹریفک کے بڑھتے ہوئے مسائل کو مدِّ نظر رکھتے ہوئے جر منی اور سنگاپور کی یونیورسٹیز کے طالب علموں نے موٹر سائیکل کی طرح نظر آنے والی لیکن کار کی طرح آرام دہ ٹیکسی ایجاد کر لی ہے۔ ایک مسافر کی گنجائش رکھنے والی یہ کم وزن موٹرسائیکل ٹیکسی برقی توانائی سے 30میل فی گھنٹہ کی رفتار سے چلنے کی صلاحیت رکھتی ہے۔VOI نامی یہ ٹیکسی تائیوان میں ہو نے والے انٹرنیشنل الیکٹرک وہیکل شو میں پیش کی گئی جسے بنانے والوں کا دعویٰ ہے کہ یہ بالکل کسی کارکی طرح محفوظ ہونے کے ساتھ ساتھ کثیرالمقاصد بھی ہے جسے ٹیکسی کے بجائے ساما ن کی نقل و حمل کے لئے بھی استعمال کیا جاسکتا ہے۔اس کی ایک انفرادیت یہ بھی ہے کہ اس میں عام ٹیکسیوں کے برعکس ڈرائیونگ سیٹ پیچھے جبکہ مسافر کے بیٹھنے کی جگہ آگے بنائی گئی ہے۔اس موٹر سائیکل ٹیکسی کو جلد ہی مارکیٹ میں متعارف کرا دیا جائے گا اور امید کی جارہی ہے کہ گنجان آباد علاقوں میں یہ تیزی سے پذیرائی حاصل کر لے گی۔