Mountains

پہاڑ

ان پہاڑوں کو ديکھو ،بعضوں کی چوٹياں آسمان سے باتيں کرتی ہيں۔ کيا باتيں کرتی ہيں؟ يہ کسی نے نہيں سنا۔
پہاڑوں کے اندر کيا ہوتا ہے؟ معلوم نہيں ۔بعض اوقات پہاڑ کو کھودو تو اندر سے چوہا نکلتا ہے۔ بعض اوقات چوہا بھی نہيں نکلتا ۔جس پہاڑ ميں سے چوہا نکلے اسے غنيمت جاننا چاہئيے۔

جو لوگ پہاڑوں پر رہتے ہيں ان کو گرم کپڑے تو ضرور بنوائے پڑتے ہيں ليکن ويسے کئي فائدے بھی ہيں ۔ پہاڑوں پر برف جمتی ہے جو ان لوگوں کو مفت مل جاتی ہے۔ جتنا جی چاہے پانی ميں ڈال کر پيئيں ۔برف ميں رہنے والوں کو ريفريجريٹر بھی نہيں خريدنے پڑتے پيسے بچتے ہيں۔

پہاڑ پتھروں کےبنے ہوتے ہيں۔ پتھر بہت سخت ہوتے ہيں ۔
جس طرح محبوبوں کے دل سخت ہوتے ہيں ۔
فرق يہ ہے کہ کبھی کبھی پتھر موم بھی ہو جاتے ہيں۔ جو پہاڑ بہت بلندی دکھاتے ہيں ان کو کاٹتے ہيں اور کاٹ کر ان کے پتھر سڑکوں پر بچھاتے ہيں لوگ انہيں جوتوں سے پامال کرتے گزرتے ہيں ۔
جو پتھر زيادہ سختی دکھائيں وہ چکی ميں پیستے ہيں ۔ سرمہ بن جاتے ہيں ۔ سارا پتھر پن بھول جاتے ہيں۔

ابن انشاء