Soorat Se Meri Ab To Shanasaa Bhi Nahi Tu

صورت سے مری اب تو شناسا بھی نہیں تُو                        
چھو کر ہی گزر جائے ہوا سا بھی نہیں تُو                          

اے دشمنِ جاں ، جان نہیں ، دل تھا نشانہ                            
اس کھیل میں ماہر تو ذرا سا بھی نہیں تُو                            

اک پل ہی سنبھل جائے مرا دل کہ مسیحآ                            
اِس کربِ مسلسل میں دوا سا بھی نہیں تُو                            

رہتا بھی نہیں دل میں جدا سا بھی نہیں ہے                          
میں تجھ کو منا لوں کہ خفا سا بھی نہیں تُو                          

کیا دن تھے چھلکتے تھے نِگاہوں سے تری جام                  
اب مجھکو میسر تو ذرا سا بھی نہیں تُو                             

محبوس ہُوا ہجر کے پنجرے میں پڑا ہوں                          
اس حبس کے عالم میں ہوا سا بھی نہیں تُو                         

جِس شاخ پہ عاطف تھے کبھی پھول وفا کے                     
اُس شاخِ تمنا پہ ہرا سا بھی نہیں تُو